گوادر دے ذریعے نیڑے ملکاں نال تجارت دے وسیع مواقع موجود ہن ، وزیراعظم شہباز شریف دی آذربائیجان دے صدر الہام علیوف نال مشترکہ پریس کانفرنس

باکو ۔15جون(اے پی پی) پاکستان اتے آذربائیجان سانجھی تجارت اتے مختلف شعبیں اچ تعاون ودھاوݨ تے اتفاق کریندے ہوئیں آکھیے موجودہ چیلنجز نال نبݨݨ کیتے رل تے کم کرݨا ہوسی ۔ وزیراعظم محمد شہباز شریف آذربائیجان دے 2 ݙینھ دے سرکاری دورے تے آذربائیجان دے صدر الہام علیوف نال ملاقات کیتی جیں توں بعد ݙوہیں رہنماواں مشترکہ پریس کانفرنس توں خطاب کیتا ۔ وزیراعظم محمد شہباز شریف آکھیے گوادر دے ذریعے نیڑے ملکاں نال تجارت دے ٻہوں سارے موقع موجود ہن ۔ پاکستان اچ شمسی توانائی کوں ودھارا ݙیوݨ تے ݙو پاسے تجارت دے حجم اچ ودھارا چاہندوں ، اساں آذربائیجان کوں پاکستانی چاول دی برآمد ودھاوݨ چاہندوں۔ انہاں ݙسایا آذربائیجان دی قومی ایئر لائن اسلام آباد کیتے پروازاں شروع کریندی پئی اے ، انہاں آکھیے آذربائیجان قدرتی وسائل توں مالا مال ملک اے، روس یوکرین جھیڑے دی وجہ توں عالمی سطح تے چیزاں دیاں قیمتاں ودھ ڳئن، موجودہ دور دے چیلنجز نال نبݨݨ کیتے رل تے کم کرݨا ہوسی۔ وزیراعظم محمد شہباز شریف آکھیے او آذربائیجان دا دورہ کرتے ٻہوں خوشی محسوس کریندے پئن انہاں آکھیے او صدر آذربائیجان دے وژن توں ٻہوں متاثر ہن، آذربائیجان نال تعلقات ودھاوݨ کوں اہم سمجھدن ، آذربائیجان تے پاکستان وچال پراݨے برادرانہ تعلقات ہن۔ وزیراعظم محمد شہباز شریف بھارت دے غیر قانونی زیر تسلط جموں و کشمیر دی صورتحال کوں اجاگر کریندے ہوئیں آکھیے بھارت دے غیر قانونی زیر تسلط جموں و کشمیر دے عوام ست ݙھاکیں توں ودھ عرصے توں بھارتی ظلم دا شکار ہن ۔ انہاں بھارت دے غیر قانونی زیر تسلط جموں و کشمیر دے جھیڑے تے آذربائیجان دی طرفوں ہمیشہ پاکستان دے مؤقف دی تائید دی تعریف کیتی ۔ وزیراعظم محمد شہباز شریف آذربائیجان دے صدر کوں دورہ پاکستان دی دعوت ݙتی ۔آذربائیجان دے صدر الہام علیوف آکھیے ملاقات اچ سانجھی تجارت ودھاوݨ تے اتفاق تھئے۔ انہاں آکھیے ݙوہیں ملکاں اچ مختلف شعبیں اچ تعاون ودھاوݨ دے موقع موجود ہن ، انہاں ݙسائے ملاقات اچ تعلیم، دفاع اتے توانائی دے شعبے اچ سانجھے تعاون ودھاوݨ تے وی ڳالھ مہاڑ تھئی اے ، انہاں ݙوہیں ملکاں دے عوام دی بہتری کیتے رل تے کم کرݨ دے عزم دا اظہار کیتے۔ آذربائیجان دے صدر وزیراعظم محمد شہباز شریف دے دورے دا خیرمقدم کریندے ہوئیں آکھیے دفاعی صلاحیتاں کوں بہتر بݨاوݨ کیتے مشترکہ فوجی مشقاں کوں ودھایا ویسی۔

مضمون کا ماخذ : کڑک

متعلقہ مضامین