لاہور۔ 16 جولائی (اے پی پی) وزیر اعظم محمد شہباز شریف آکھیا جو معیشت کوں مستحکم کرݨ کیتے جرات مندانہ فیصلے کرݨے پوسن، انقلابی اقدامات نال پاکستان اچ معاشی ترقی تھی سڳدی اے، عوام نواز شریف اتے اوندی ٹیم کوں موقع ݙتا تاں ملک دی تقدید بدل ݙیسوں۔ اے ڳالھیں انہاں آݙت وار کوں گورنر ہاؤس اچ یوتھ بز نس اینڈ ایگریکلچر لون سکیم دے تحت نینگراں اچ چیک تقسیم کرݨ دی تقریب توں خطاب کریندیں ہوئیں آکھی۔ ایں موقع تے گورنر پنجاب محمدبلیغ الرحمن،اسپیشل اسسٹنٹ فار یوتھ افئیرز شزہ فاطمہ، وزیر اعظم دے مشیراحد چیمہ، معاون خصوصی عطا تارڑ،صدر بینک آف پنجاب ظفر مسعود،وزرا ،پارلیمنٹیرینز،سرکاری افسراں اتے نینگراں سودھے تریمتیں دی وݙی تعداد موجود ہئی۔ وزیر اعظم محمد شہباز شریف آکھیا جو پٹرول دے نرخ ڳھٹ کرݨ دا اعلان روپے دی قدر ڈالر دے مقابلے ودھݨ پاروں عوام کوں ریلیف ݙیوݨ کیتے کیتا ڳے۔ آئی ایم ایف دا اے چنڳا پہلو اے جو روپیہ ٹکدا پے اتے پروگرام نہ ہوندا تاں روپیہ کتھ ہوندا اتے ملک دی معاشی صورتحال وڳڑ ویندی۔ تقریب اچ شزہ فاطمہ خطاب کریندیں ہوئیں آکھیا جو 5 لکھ روپے دے بلاسود قرضے ݙتے ویندے پن، پنج مہینے اچ 30 ارب روپے دے قرضے ݙتے ڳن اتے ایں بارے بینک آف پنجاب 10ارب دے قرضے تقسیم کرتے ایں مہم دی کامیابی اچ اہم کردار ادا کیتے۔ تقریب اچ قرضہ ڳھنݨ آیاں دی کامیاب زندگی بارے دستاویزی ویڈیوز وی ݙکھائی ڳی۔ تقریب اچ تھر پارکر توں کانتا گورسوامی کوں اسٹیج تے سݙیا ڳیا جئیں اپݨی کامیابی بارے ݙسیا۔ تقریب اچ وزیر اعظم 5لکھ روپے تئیں دے بغیر سود قرضیاں دے چیک وی تقسیم کیتے ، چیک وصول کرݨ آلیاں اچ محمد زاہد،اختر حسین،محمد افضل،قاسم علی،محمد بلال،عبدلمالک،حافظ ابوبکر،محمد عبداللہ ،عاقب رمضان،عبدالقیوم ،سلمیٰ کلثوم،عابدہ پروین ،افشا آصف اتے شمسہ یاسر دی وزیر اعظم نال گروپ فوٹو ٻݨوائی ڳی۔
