ٻاہرلے ملک رہݨ پاکستانیاں دی فلاح بہبود ، انہاں دے مسئلے ترجیحی بنیاداں تے حل کیتے ہر ممکن قدم چیسوں ،وزیرخارجہ شاہ محمود قریشی دی چیئرمین نادرا نال ملاقات اچ ڳال مہاڑ

اسلام آباد۔1جولائی (اے پی پی):وزیرخارجہ مخدوم شاہ محمود قریشی آکھیے جو ٻاہرلے ملک رہݨ آلے پاکستانی اساݙا قیمتی اثاثہ ہن ، انہاں دی فلاح و بہبود اتے انہاں دے مسئلیں دے ترجیحی بنیاداں تے حل سانگے ہرممکن قدم چیسوں،شکایتاں دے ازالے کیتے وزارتِ خارجہ اچ ایف ایم پورٹل قائم کر ݙتا ڳئے ۔ اے ڳال انہاں چیئرمین نادرا طارق ملک نال ملاقات اچ آکھی اے جنہاں خمیس کوں وزارت خارجہ اچ انہاں نال ملاقات کیتی ۔ ملاقات اچ ٻاہرلے ملک رہݨ آلے پاکستانیاں کوں نادرا ولوں ݙتیاں ونڄݨ آلیاں مختلف سہولتاں دے حوالے نال ڳال مہاڑ کیتی ڳئی۔ وزیر خارجہ بطورچیئرمین نادرا ذمہ واریاں سنبھالݨ تے طارق ملک کوں مبارخ ݙتی اے ۔ چیرمین نادرا طارق ملک ٻاہرلے ملک رہݨ آلے پاکستانیاں کوں جانشینی سرٹیفکیٹ دے حصول اچ نادرا ولوں متعارف کروائے ڳئے نویں ڈجیٹل نظام بارے وزیر خارجہ کوں ݙسایا ، وزیر خارجہ نادرا ولوں باہرلے ملک پاکستانیاں کوں ݙتیاں ونڄݨ آلیاں سہولتاں دی تعریف کیتی۔ وزیر خارجہ آکھیے جو ٻاہرلے ملک رہݨ آلے پاکستانیاں دی شکایت دے ازالے کیتے ، وزارتِ خارجہ اچ ایف ایم پورٹل قائم کرݙتا ڳئے۔ چیئرمین نادرا ٻاہرلے ملک پاکستانیاں کوں کمپیوٹرائزڈ جانشینی سرٹیفکیٹ اتے لیٹر آف ایڈمنسٹریشن دے حصول کیتے آن لائن بائیومیٹرک ویریفکیشن دی سہولت بارے مفصل بریفنگ ݙتی ۔ انہاں آکھیے جو ایں نظام دے تحت ٻاہرلے ملک رہݨ آلے پاکستانی ہݨ گھر ٻہہ تے نادرا دی ڈجیٹل سروسز توں فیدہ چاسڳسن ۔ ایندے توں پہلے جانشینی سرٹیفکیٹ گھنݨ کیتے قانونی طور تے سارے ورثاء کوں عدالتاں اچ بذات خود پیش تھیوݨا پوندا ہئی۔

مضمون کا ماخذ : امکان ہے کہ میگا سینا

متعلقہ مضامین