قومی معیشت بہتری آلے پاسے ٹردی پئی اے ،زرمبادلہ دے ذخیرے تے برآمدات ودھ ڳئن ، گروپ 20 اچ رلݨ سانڳے معیشت کوں دستاویزی بݨاوݨا ہوسی،وزیر خزانہ محمد اورنگزیب دی پریس کانفرنس

APP02-290924 ISLAMABAD: September 29 - Federal Minister for Finance and Revenue Senator Muhammad Aurangzeb addressing a press conference at PTV Headquarter. APP/SAK/FHA

اسلام آباد۔29ستمبر (اے پی پی) وفاقی وزیرخزانہ سینیٹر محمد اورنگزیب آکھیے مائیکر اکنامک استحکام منزل کائنی ھک رستہ اے ، گروپ 20 اچ رلݨ سانڳے معیشت کوں دستاویزی بݨاوݨا ہوسی ، قومی معیشت بہتری آلے پاسے ٹردی پئی اے ، آئی ایم ایف نال پروگرام طے تھی ڳئے، زرمبادلہ دے ذخیرے تے برآمدات ودھ ڳئن ، افراط زر دی شرح سنگل ڈیجٹ اچ آچکی اے، مہانگ گھٹ تھیوݨ پاروں ریٹ وی گھٹیے ، وزیراعظم محمد شہباز شریف ݙینھ رات ملکی ترقی سانڳے کم کریندے پئن ، سٹاک مارکیٹ نویاں حداں پار کریندی پئی اے ، سرمایہ کاراں دے اعتماد اچ ودھارا معاشی استحکام دی وݙی کامیابی اے،نجی شعبہ کوں ملک کوں لیڈ کرݨا ہوسی ، ٹیکس محصولات اچ ودھارا ناگزیر اے، ایف بی آر دی استعداد ودھاوݨ سانڳے چارٹرڈ اکائونٹس دی خدمات ڳھدیاں ویسن ، سرکاری اداریں اچ اصلاحات جاری ہن، وزارتاں دی رائٹ سائزنگ کیتی ویندی پئی اے ، 2 وزارتاں کوں ختم کیتا ویندا پئے ، مختلف وزارتاں اچ ھک لکھ 50 ہزار آسامیاں کوں ختم کیتا ویندا پئے ۔ اے ڳالھیں انھاں چیئرمین ایف بی آر راشد لنگڑیال دے رلے پریس کانفرنس اچ آکھئن ۔ وزیر خزانہ میکرو اکنامک استحکام زرمبادلہ، افراط زر اتے آئی ایم ایف پیکج سودھے برآمدات تے حسابات جاریہ دے حوالے نال آکھیے معاشی اعشاریے مثبت اتے سدھے پاسے اڳوں ٹردے پئن ، برآمدات اچ تنوع دا رجحان اے ، آئی ٹی دی برآمدات اچ سالانہ بنیاداں تے 29 فیصد ودھارا تھئے جیڑھا مثبت رجحان اے، افراط زر تے انھاں آکھیے حکومت دے شروع اچ اے شرح 38 فیصد ہئی ۔ جݙاں جو حکومت دے اقدامات دے نتیجے اچ اے مسلسل گھٹ تھیندی پئی اے ۔ آئی ایم ایف نال سٹینڈ بائی معاہدہ دے حوالے نال وزیر خزانہ آکھیے اے معاہدہ وزیراعظم محمد شہباز شریف دی قیادت ا مکمل تھئے، ملک دے اداریں تے انتظامی حکام دیاں کوششاں وی قابل تحسین ہن۔ انہاں اہم کردارنبھائےجیں تے انھاں دا مشکور ہاں، جاری مالی سال دے پہلے ترائے مہینے چ میکرو اکنامک استحکام دی صورتحال تے وزیر خزانہ ݙسائے اپریل اچ آئی ایم ایف نال میٹنگ تھئی تاں میں آئی ایم ایف حکام کوں ݙسایا جو اساں نو مہینے دا سٹینڈ بائی ایگریمنٹ ( ایس بی اے) مکمل کریسوں تاں اساں چاہندوں جو ھک وݙا تے توسیعی پروگرام کیتا ونڄے جولائی اچ ول ملاقات تھئی گزریل ہفتے آئی ایم ایف بورڈ ایندی منظوری ݙتی تے پہلی قسط وی مل ڳئی اے۔ آئی ایم ایف کنے ونجݨ دی ݙو وجوہات ہن، پہلی میکرو اکنامک استحکام گھن آوݨ تے ݙوجھا ڈھانچہ جاتی اصلاحات ہن جیڑھے جو معاشی استحکام سانڳے ٻہوں ضروری ہن وزیر خزانہ مزید آکھیے میکرو اکنامک استحکام دے مثبت رجحانات ھک تھیوری نی رہی بلکہ اساں ایندے نتیجے ݙیکھدے پیوں ، یو این پاکستان بزنس کونسل نال امریکہ اچ ملاقات دا حوالہ ݙیندے انھاں آکھیے بزنس کونسل دے وفد اچ مختلف سیکٹرز دی نمائندگی ہئی جیں اچ آئی ٹی، فنانشل سروسز تے انرجی سیکٹر سودھے ٻئے شعبیں دے سرمایہ کار اتے بزنس مین وی شامل ہن ۔ ملکی سٹاک ایکسچینج نویاں حداں پار کریندی پئی اے تے صحیح طریقے نال اڳوں ودھدی پئی اے ، بی ٹو بی رابطیں اچ بہتری نال آرامکو، بی وائی ڈی سودھے ٻیاں کمپنیاں ملک براہ راست سرمایہ کاری کیتی اے تے سارا وی میکرواکنامک استحکام توں ممکن تھئے ۔ وزیر خزانہ محمد اورنگزیب مزید آکھیے معاشی استحکام، افراط زر گھٹݨ پاروں پالیسی ریٹ گھٹ تھئے ، 450 بیس پوائنٹس دی کمی تھئی اے ، صنعتی شعبہ پالیسی ریٹ دی بجائے اسلامک بینکنگ اچ دلچسپی گھندا پئے ، وزارت خزانہ پی آئی بی اتے ٹی بلز سودھے ٻئے بڈز کوں مسترد کرݙتے ایندی ترائے وجہ ہن جنھاں اچ مالیاتی استحکام سرفہرست اے، حکومت کوں معاشی قرض اچ دلچسپی کائنی ، اساں قرضے دے خرچے گھٹ کریندے پیوں ساݙے خرچیں اچ قرض دی ادائیگی دا وݙا حصہ اے، وفاقی وزیر آکھیے بڈز کوں مسترد کرݨ دی ھک وجہ اے وی ہئی جو حکومت چاہندی اے بینکنگ سیکٹر نجی شعبہ کوں قرضے ݙیوے جیڑھے ملکی ترقی اچ کردار نبھاسڳدن ۔ آئی ایم ایف پروگرام تے انھاں آکھیے ملک سانڳے اہم ویلھا اے جے اساں ترقی چاہندوں تاں آپݨا رستہ ݙیکھݨا ہوسی اساں آپݨی سمت سانڳے واضح ہیسے ، ایں سانڳے اصلاحات ضروری ہن جیں سانڳے تھنک ٹینکس نال وی مشورہ کیتا ڳئے ، اساں آپݨے بہترین دماغاں نال مشاورت کریندوں مقامی تےغیر ملکی ماہرین دی مشاورت ضروری اے، جی ڈی پی دے مقابلے اچ ٹیکس دی شرح تے وزیر خزانہ آکھیے اینکوں ودھایا ویسی ۔معیشت کوں برآمدی معیشت اچ بدالیا ویسی ۔حکومتی سرکاری کاروباری اداریں دی اصلاحات کیتیاں ویندیاں پئن خرچے گھٹاوݨ سانڳے وفاقی حکومت دی رائٹ سائزنگ سانڳے کمیٹی کم کریندی پئی اے ، 6 وزارتاں دا فیصلہ کیتا ڳئے ھک وزارت کوں ختم کریندے پیوں ، کیڈ دی وزارت ختم کیتی ویندی پئی اے ݙو وزارتاں کوں ملا تے ھک وزارت بݨائی ویندی پئی اے ۔ ایں توں انڄ وزارتاں تے ذیلی اداریں دا تفصیلی جائزہ ڳھدا ویندا پئے ، جنھاں وزارتاں دا فیصلہ کیتا ڳئے ہݨ انھاں بارے عمل درآمد پلان تے کم کیتا ویندا پئے تاں جو ایں کوں مکمل کیتا ونڄ سڳے۔ 2019 اچ وی منصوبہ بݨایا ڳیا جیڑھا مکمل نہ تھی سڳیا ، عملدرآمد پلان بارے انہاں آکھیے کابینہ دی منظوری توں خالی آسامیاں دا 60 فیصد حصہ جیڑھا ڈݙھ لکھ بݨدے ایں کوں ختم کیتا ویندا پئے ایں نال خرچے گھٹسن مرحلہ وار اقدامات کیتے ویندے پئن ۔ اڄوکے مالی سال5 وزارتاں دے فیصلہ کوں چھیکڑی شکل ݙتی ویسی ۔ 18 ویں ترمیم موجب وزارتاں کوں منتقل کیتا ویسی جیڑھے ادارے تے وزارتاں رکھیاں ویسن انھاں دی کاکردگی کوں چنڳاں بݨایا ویسی تاں جو او عوم سانڳے کم کرن۔ ٹیکس وصولیاں دے حوالے نال وزیر خزانہ آکھیے گزریل مالی سال اچ 30 ستمبر تئیں 1.6 ملین گوشوارے جمع کرائے ڳئے جیڑھے اڄوکے سال اچ ݙوگنا تھی کن ہݨ تئیں 3.2 ملین گوشوارے جمع کرائے ڳئن ۔ گزریل سال ایں عرصے اچ 3 لکھ نویں فائلر ہن جݙاں جو اجوکے سال ایں ویلھے تئیں7 لکھ 23 ہزار نویں فائلر آچکن ۔اے ٻہوں اہم اے اساں کرتے ݙکھا چکیوں ، نان فائلرز تے انڈر فائلرز تے وزیر خزانہ آکھیے انڈر فائلنگ دے ذریعہ 1.3 کھرب روپے دے ٹیکسز کوں لُکایا ویندے ، جی 20 اچ رلݨ معیشت کوں دستاویزی شکل ݙیوݨی ہوسی جݙاں 9 کھرب روپے کیش مارکیٹ اچ ہے جݙاں جو ایف بی آر دے محصولات دا ہدف 9.3 کھرب اے، ایں ویلھے ساݙی معیشت دا حجم 700 ارب روپے توں ودھ اے جݙاں جو دستاویزات اچ 325 ارب روپے ہے، جے اساں جی 20 اچ ونڄݨا اے تاں ڈاکومینٹیشن دے پاسے ودھݨا چاہیدے ، اصلاحات توں ٹیکس محصولات اچ ست کھرب دا ودھارا ممکن اے ، نان فائلر گاݙی، جائیداد مل نہ گھن سڳسن ، میوچل فنڈ ، کرنٹ بینک اکائونٹ نہ کھلو سڳسن ، رقم وصولیاں تے جمع کراوݨ اچ انھاں کوں اوکھ تھیسی ۔ آپݨی چھیکڑی ڳالھ اچ انھاں آکھیے بنیادی ضرورتاں دی تکمیل اتے خرچے گھٹاوݨ اہم اے ساݙی آبادی 2.55 فیصد دی شرح ودھارا پائیدار ترقی اچ مسئلے پیدا کریندی اے ایویں موسمیاتی تبدیلیاں دے حوالے نال آپݨیاں صلاحیتاں ودھاوݨیاں ہوسن ۔ ھک سوال تے وزیر خزانہ آکھیے جے افراد زر اتے پٹرولیم مصنوعات دیاں قیمتاں گھٹئن تاں آئی ایم ایف پروگرام صرف وفاقی کائنی بلکہ اساں سارے صوبائی حکومت دا وی ہے۔صوبیں توں درخواست کیتی ہئی جو قیمتاں کنٹرول کرݨ آلیاں کمیٹیاں فعال کرن تاں جو قیمتاں گھٹاوݨ اچ عمل درآمد کرایا ونڄے صوبائی حکومتاں دے رلے کم کریندے پیوں تاں جو عام بندے کوں ریلیف ملے ۔ ٹیکسز تے توانائی دیاں قیمتاں سودھے شرح سود کوں گھٹ کرتے کاروباری شعبہ دے مسئلے کوں ختم کیتا ویسی تاں جو پائیدار اقتصادی ترقی ملے۔

مضمون کا ماخذ : لوٹیریا سانتا کیٹرینا

متعلقہ مضامین