اسلام آباد۔22اگست (اے پی پی) وزیر اعظم محمد شہبازشریف پاکستان دی سماجی تے اقتصادی ترقی کیتے جرمنی دے تعاون دی تعریف کریندیں ہوئیں آکھیا جو پاکستان اتے جرمنی آپسی طور تے مفید تجارتی اتے اقتصادی تعلقات موجود ہن جئیں کوں او مستحکم ݙیکھݨ چاہندن۔ خمیس کوں وزیر اعظم آفس دے میڈیا ونگ توں جاری پریس ریلیز موجب وزیر اعظم نال جرمنی دی وفاقی وزیر برائے اقتصادی تعاون و ترقی سوینجا شولزے وزیرِ اعظم ہاؤس اسلام آباد اچ ملاقات کیتی۔ وزیراعظم وزیر شلزے دا پاکستان اچ خیر مقدم کیتا اتے پاکستان دی سماجی تے اقتصادی ترقی کیتے جرمنی دے تعاون دی تعریف کیتی۔ انہاں آکھیا جو پاکستان اتے جرمنی وچال آپسی طور مفید تجارتی اتے اقتصادی تعلقات موجود ہن۔ انہاں پاکستان دی صنعتی ترقی اچ جرمنی دے کردار دی تعریف کیتی۔ ایں بارے وزیراعظم پاکستان جرمنی سانجھے داری کوں ودھاوݨ دی خواہش کیتی۔ وزیراعظم پائیدار ترقی، موسمیاتی تغیرات دے مضر اثرت اچ ڳھٹکی اتے معاشی نمو کیتے پاکستان دا عزم اجاگر کیتا جڈانجو ملک دی معاشی بحالی کیتے اصلاحات سودھے آپݨی حکومت دی ترجیحات دا وی ذکر کیتا۔ وزیر شلزے وزیر اعظم کوں چانسلر اولاف شولز دا تہنیتی سنیھا پڄایا اتے پاکستان نال ݙوپاسہ تعلقات خصوصی طور تجارت سرمایہ کاری اتے ترقیاتی تعاون دے شعبیاں اچ سانجھ مضبوط ٻݨاوݨ کیتے جرمنی دے عزم دا اعادہ کیتا۔ انہاں اے وی ݙسیا جوجرمنی پاکستان دے قابل تجدید توانائی دے شعبے اتے موسمیاتی تبدیلی توں بچاؤ دے اقدامات کیتے تعاون ودھاوݨ چاہندے۔ وزیرِ اعظم اتے جرمنی دی وزیرِ اقتصادیات ݙوپاسہ اقتصادی تعاون ودھاوݨ دے لائحہ عمل تے ڳالھ کیتی جئیں اچ تجارت، سرمایہ کاری،آئی ٹی اتے ٹیکنالوجی دی منتقلی دے نال ہنر مند افرادی قوت دی برآمد شامل اے۔ انہاں غزہ دی صورتحال اتے یوکرین تنازعہ سودھے علاقائی اتے عالمی مسئلیاں تے وی ڳالھ کیتی۔ وزیرسوینجا شولزے چانسلر اولاف شولز ولوں وزیر اعظم کوں اکتوبر آچ ہیمبرگ پائیداری کانفرنس اچ شریک تھیوݨ دی دعوت ݙتی۔ ملاقات اچ ݙوہیں پاسوں دے سینئر حکام شریک تھیے جئیں اچ نائب وزیر اعظم اتے وزیر خارجہ، وزیر برائے منصوبہ بندی، وزیر برائے اقتصادی امور، وزیر تجارت اتے وزیر مملکت برائے آئی ٹی شامل ہن۔
.jpg)
