پیپلزپارٹی خیبر پختونخواہ کوں ناں تے سنڄاݨ ݙتی اے، سرائیکیاں کوں اپݨا انڄھ صوبہ وی ݙیسی، سینئر رہنما پیپلزپارٹی محمد زمین خان

اسلام آباد۔27جون(اے پی پی)پاکستان پیپلز پارٹی کے پی کے دے سینئر رہنما محمد زمین خان آکھیے جو پاکستان پیپلزپارٹی عام لوکاں دی جماعت اے ڄئیں ملک و قوم کیتے جاناں تئیں ݙتن، اپݨی رت نال سرزمین دی آبیاری کریسوں اتے وطن کوں پچھونہا نا تھیوݨ ݙیسوں۔ اے پی پی سرائیکی سروس نال ڳالھ مہار کریندے انہاں آکھیا جو پاکستان پیپلزپارٹی ہی خیبر پختونخواہ کوں سنڄاݨ اتے ناں ݙتے، امید اے جو پاکستان پیپلز پارٹی ہی ولا اقتدار اچ آ تے سرائیکیاں کوں اپݨا انڄھ صوبہ ݙیسی اتے جنوبی پنجاب دا خواب پورا تھیسی۔ انہاں آکھیا جو خیبرپختونخواہ خاص کر قبائل دہشتگردی دے خلاف جنگ اتے امن ڳھن آوݨ کیتے وݙیان قربانیاں ݙتن، میݙے تے خود حملہ تھئے اتے میݙا ٻھرا وی شہید تھئے، ٻھل اللہ دا شکر اے جو انہاں قربانیاں پاروں اڄ امن اے اتے دہشتگردی دا پاڑاں پٹ ݙتن۔ انہاں آکھیا جو اپݨے علاقائی مسلیاں دے حل کیتے پیپلزپارٹی قیادت دی رہنمائی نال پسماندگی مکاوݨ، عوامی مسلیاں خاص کر سڑک، سکول اتے پیوݨ دے صاف پاݨی دے مسائل حل کرݨ کیتے ݙینھ رات محنت کریندے پئے ہیں، کوشش اے جو پسماندگی دا خاتمہ تھیوے اتے لوک اپݨے پیریں تے کھڑے تھیون، امید اے پیپلزپارٹی آندے انٹخابات اچ ودھ کامیابی ڳھنسی اتے غربت مکاوݨ دے منشور کوں تیکھا ڳھن تے اڳو تے ٹرسی۔

مضمون کا ماخذ : ریل رش

متعلقہ مضامین