معروف شاعر،ادیب تے ڈرامہ نویس امجد اسلام امجد انتقال کرڳئن

اسلام آباد۔10فروری (اے پی پی):معروف شاعر، ادیب اتے ڈرامہ نویس امجد اسلام امجد انتقال کرڳن،انہاں دی عمر78 سال ہئی ۔امجد اسلام امجد دےاہل خانہ انہاں دے انتقال دی تصدیق کریندے ہوئیں آکھیے جو انہاں دا انتقال دل دا دورہ پووݨ توں تھئے ۔امجد اسلام امجد 4 اگست 1944 کوں لاہور اچ ڄمیے ، انھاں 1967 اچ پنجاب یونیورسٹی توں ایم اے (اردو) کیتا، 1968 توں 1975 ایم اے او کالج لاہور دے شعبہ اردو اچ استاد رہیے تے اگست 1975 اچ امجد اسلام امجد کوں پنجاب آرٹ کونسل دا ڈپٹی ڈائریکٹر مقرر کیتا ڳیا ۔90 دے ݙھاکے اچ امجداسلام امجددی خدمات ول محکمہ تعلیم دے حوالے کرݙتیاں ڳیاں تے او ول ایم اے او کالج اچ ہی شعبہ تدریس نال منسلک تھی ڳئے ۔ 1975ء توں گھن تے 1979ء تئیں او پاکستان ٹیلی وژن توں بطور ڈائریکٹر وابستہ رہیے۔انہاں ’اردو سائنس بورڈ‘ اتے ’چلڈرن لائبریری کمپلیکس‘ سودھے ٻہوں سارے سرکاری اداریں اچ سرکردہ عہدیں تے ذمے واریاں نبھائیاں ۔ریڈیو پاکستان توں بطور ڈرامہ نگار کجھ سال وابستہ رہݨ دے بعد امجد اسلام امجد پی ٹی وی کیتے کئی سیریلز لکھیاں جنہاں اچ ’برزخ‘، ’عکس‘، ’ساتواں در‘، ’فشار‘، ’ذراپھر سے کہنا‘(شعری مجموعے)، ’وارث‘، ’دہلیز‘(ڈرامے)، ’آنکھوں میں تیرے سپنے‘(گیت) ، ’شہردرشہر‘(سفرنامہ)، ’پھریوں ہوا‘ ،’سمندر‘، ’رات‘، ’وقت‘،’اپنے لوگ‘،’یہیں کہیں ‘ شامل ہن ۔ایں توں انڄ تنقیدی مضامین دی ھک کتاب ’تاثرات‘ وی انہاں دی تصنیف اے ۔نظم و نثر اچ انہاں دی 40 توں ودھ کتاباں زیورِ طبع توں آراستہ تھی چکن جݙاں جو او آپݨی ادبی خدمات دے بدلے ’صدارتی تمغۂ حسن کارکردگی‘ اتے ’ستارہ امتیاز‘ دے علاوہ کئی واری ٹیلی وژن دے بہترین رائٹر، گریجویٹ ایوارڈ اتے ٻئے ایوارڈ حاصل کرچکن ۔امجد اسلام امجد شاعر، ڈرامہ نگار اتے نقاد دی حیثیت توں شہرت حاصل کیتی، امجد اسلام امجد دا شعری مجموعہ برزخ اتے جدیدعربی نظماں دےتراجم عکس دے ناں توں شائع تھئے مزید برآں افریقی شعرادی نظماں دا ترجمہ کالے لوکاں دی روشن نظماں دے ناں توں شائع تھئے ۔امجد اسلام امجد کوں ستارہ امتیاز، صدارتی تمغہ حسن کارکردگی سودھے کئی ایوارڈ نال نوازاڳیا۔

مضمون کا ماخذ : قزاقوں کی کافی مقدار

متعلقہ مضامین