اسلام آباد۔20ستمبر(اے پی پی)قومی اسمبلی دی قائمہ کمیٹی برائے اطلاعات و نشریات پاکستان ٹیلی ویژن دا ڄڳ اچ تشخص بحال کرݨ تے زور ݙیندے پی ٹی وی دے موجودہ بنیادی ڈھانچے اتے انسانی وسائل دے استعمال دی تجویز ݙتی جو پی ٹی وی کوں منافع بخش ادارہ ٻݨایا ونڄے۔ اجلاس چیئرمین کمیٹی پولین بلوچ دی اڳواݨی اچ پی ٹی وی ہیڈ کوارٹرز اسلام اباد اچ تھئے جیدنے اچ پی ٹی وی بارے ایجنڈے اتے میڈیا ورکرز کوں تنخواہیں ݙیوݨ دے معاملے تے غور تھئے۔ کمیٹی آکھیا جو پی ٹی وی کوں فیملی چینل ٻݨاوݨ، جدید رجحانات نال جوڑݨ کیتے پی ٹی وی دے ودھ وسائل اتے جدید ترین انفراسٹرکچر کوں استعمال کیتا ونڄے، پیمرا اتے پی آئی ڈی میڈیا ورکرز دیاں تنخواہیں اتے بقایا جات ݙیوݨ کیتے کوششاں جاری رکھن۔ اجلاس اچ وفاقی سیکریٹری اطلاعات عنبرین جان آکھیا جو ریڈیو پاکستان اتے پی ٹی وی دے بورڈز دی تشکیل نو کیتی ویندی پئی اے ڄیڑھی تیکھے مکمل تھی ویسی، مستقل ڈائریکٹر جنرل پی بی سی اتے منیجنگ ڈائریکٹر پی ٹی وی دی تقرری بورڈ دے نوٹیفکیشن دے بعد کیتی ویسی۔ ایں سانڳے کڄھ مختلف شخصیات کوں وی انہاں اداریاں دے بورڈز رلاوݨ دا فیصلہ کیتے۔ انہاں آکھیا جو پی ٹی وی اچ بہتری کیتے حکومت نجی شعبے توں اینکرز ڳھنݨ، جدید آلات اچ سرمایہ کاری، ڈیجیٹل انفراسٹرکچر دی ترقی، مواد دی جدت سودھا مالیاتی حکمت عملی ٻݨائی اے جیندے اچ مسابقتی ریٹ دے مطابق اشتہارات کیتے موجودہ مالیاتی حکمت عملی بہتر کرݨ، بجٹ کنٹرول اقدامات، آپریشنل لاگت اچ کمی شامل اے۔ اجلاس اچ منیجنگ ڈائریکٹر پی ٹی وی آکھیا جو پی ٹی وی ملازمین کوں جدید نشریاتی ٹیکنالوجی، مواد دی تخلیق اتے انتظام دی تربیت ݙتی ویسی جو جدت ودھیڄے، نواں ٹیلنٹ سامݨے آوے۔ پی ٹی وی اچ اصلاحات کیتے کمیٹی ارکان وی تجویزاں ݙتن۔ کمیٹی سارے پی ٹی وی سٹیشناں تے عملے، انفراسٹرکچر اتے گاݙیاں دی تفصیلات سودھا نجی شعبے توں بھرتی کیتے گئے اینکرز کوں پیکجز دی تفصیل ݙیوݨ دی ہدایت کیتی۔ اجلاس اچ اراکین قومی اسمبلی محمد حنیف عباسی، کرن عمران ڈار، مہتاب اکبر راشدی، شرمیلا فاروقی، سحر کامران، سید امین الحق، محمد مقداد علی خان، مولانا عبدالغفور حیدری، بیرسٹر دانیال چوہدری، پارلیمانی سیکرٹری برائے اطلاعات و نشریات، سیکریٹری وزارت اطلاعات و نشریات، منیجنگ ڈائریکٹر پی ٹی وی، پرنسپل انفارمیشن آفیسر پی آئی ڈی، ڈائریکٹر جنرل ریڈیو پاکستان، چیئرمین پیمرا اتے متعلقہ محکمیاں دے افسران شرکت کیتی۔
