بئنڪون مارڪيٽ جي تازن رجحانن ۽ مطالبن تي تحقيق ڪرڻ جي رجحان کي فروغ ڏيڻ لاءِ يونيورسٽين سان رابطا قائم ڪن: صدر

APP54-300821 KARACHI: August 30 President Dr Arif Alvi addressing the 4th Round Table Conference on Islamic Banking. APP

ڪراچي – 30 آگسٽ (اي پي پي) صدر ڊاڪٽر عارف علوي بئنڪن تي زور ڏنو آهي ته اهي مارڪيٽ جي تازه ترين رجحانن ۽ مطالبن تي تحقيق ڪرڻ جي رجحان کي فروغ ڏيڻ جي لاءِ يونيورسٽين سان رابطا قائم ڪن. اسلامي بئنڪنگ بابت چوٿين گول ميز ڪانفرنس ۾ خاص مهمان طور خطاب ڪندي صدر چيو ته جڏهن يونيورسٽين جا شاگرد اڳ ۾ ئي ايم فل ۽ پي ايڇ ڊي جي لاءِ مختلف موضوعن تي مطالعو ڪري رهيا آهن ته اهڙي صورت ۾ تحقيق جي لاءِ جدا ادارو قائم ڪرڻ جي ضرورت ڇو محسوس ڪئي وئي. هن چيو ته ريسرچ شاگردن کي بئنڪنگ سيڪٽر پاران رهنمائي ۽ سرپرستي ڏيڻ گهرجي ته جيئن انهن جي ڪوششن کي مارڪيٽ جي ضرورتن ۽ جديد رجحانن سان هم آهنگ ڪري سگهجي. هن وڌيڪ چيو ته اهڙي طرح بئنڪن کي گهربل تحقيق حاصل ٿيندي جڏهن ته شاگردن کي وڌيڪ لڳاءُ سان ڪم ڪرڻ جي ترغيب ملندي. هن چيو ته ڪنهن شخص جي موت جي فوري پوءِ دولت ۽ ملڪيت جي وراثت جي منتقلي پڻ اسلام جي تعليم جو روح آهي. هن پاڪستان ۾ اسلامي شرعي تعميل جي قدمن تي پڻ زور ڏنو. ڊاڪٽر عارف علوي بئنڪنگ سيڪٽر پاران عورتن کي بااختيار بڻائڻ جي لاءِ مالي مدد جي لاءِ قرضن جو هڪ حصو وقف ڪرڻ تي پڻ زور ڏنو ته جيئن اهي ملڪ جي پائيدار ترقي ۾ مثبت ڪردار ادا ڪري سگهن. ان کان اڳ ناڻي واري وفاقي وزير شوڪت ترين، وزيراعظم جي صلاحڪار ڊاڪٽر عشرت حسين، اسٽيٽ بئنڪ آف پاڪستان جي گورنر ڊاڪٽر باقر رضا، پاڪستان اسٽاڪ ايڪسچينج جي چيئرپرسن ڊاڪٽر شمشاد اختر، سنڌ بئنڪ جي چيئرمين شريعه بورڊ اسلامڪ بئنڪنگ ڊويزن مفتي محمد نجيب خان پڻ خطاب ڪيو جڏهن ته سنڌ جو گورنر عمران اسماعيل ۽ ٻيا معزز پڻ ان موقعي تي موجود هئا. ان موقعي تي خطاب ڪندي ڊاڪٽر عشرت حسين چيو ته اسلامي بئنڪنگ سسٽم کي جديد چئلينجز کي منهن ڏيڻ جي صلاحيت حاصل ٿي ۽ اها روايتي نظام جي متبادل طور سامهون اچي سگهي ٿي. هن چيو ته ٻنهي ڌرين کي اسلامي بئنڪاري تحت منافعي ۾ هڪ جهڙو شيئر مليو آهي، جنهن کي هن نظام جي خوبصورتي قرار ڏنو. ڊاڪٽر عشرت حسين اسلامي بئنڪاري پاران نظرانداز ڪيل شعبن تي ڌيان ڏيڻ جي ضرورت تي پڻ زور ڏنو. اسٽيٽ بئنڪ آف پاڪستان جي گورنر ڊاڪٽر رضا باقر شرڪت ڪندڙن کي آگاهه ڪيو ته اسلامي بئنڪاري جي سهولت 60 کان وڌيڪ ملڪن ۾ دستياب آهي ۽ چيو ته اها صحيح رخ ۾ گامزن آهي. هن ٻڌايو ته ٻاهرئين ملڪ رهندڙ پاڪستاني شهرين ان نظام ۾ گهري دلچسپي ورتي. هن ياد ڏياريو ته گذريل ٻن سالن ۾ شروع ڪيل سمورين اسڪيمن تي ماڻهن جو ردعمل ذڪر جوڳو هو. هن شرعي ڪمپلائنس جي نظام تحت زراعت ۽ ننڍي ۽ وچولي درجي جي ڪاروباري ادارن (ايس ايم ايز) جي شعبن جي لاءِ مصنوعات کي ڊيزائن ڪرڻ تي پڻ زور ڏنو ته جيئن انهن شعبن سان واڳيل ماڻهن کي سهولت فراهم ڪري سگهجي. ان موقعي تي خطاب ڪندي مفتي نجيب چيو ته اسلامي بئنڪاري کي فروغ ڏيڻ جي لاءِ پوري دنيا ۾ ڪوششون جاري آهن. مفتي نجيب اها تجويز پڻ ڏني ته اسلامي بئنڪاري کي ملڪ جي تعليمي نصاب ۾ شامل ڪيو وڃي. هن اسلامي بئنڪاري ۽ حلال انڊسٽري جي فروع بابت عوام ۾ شعور پيدا ڪرڻ جي لاءِ قدم کڻڻ جي ضرورت تي زور ڏنو.

مضمون کا ماخذ : لاٹری آن لائن خریداری

متعلقہ مضامین