کوئی بکھا نہ سمے پروگرام کوں پورے ملک تئیں ودھیسوں ،وزیر اعظم عمران خان

اسلام آباد۔11اپریل (اے پی پی):وزیر اعظم عمران خان آکھیے جو کوئی بکھا نہ سمے پروگرام کوں پورے ملک تئیں ودھیسوں، مخیر حضرات ایں پروگرام اچ آپ دا بھرپور کردار ادا کرن ،ہر شہری کیتے ہیلتھ انشورنس دا پروگرام قابل فخر اے،ایں پروگرام دے بعد ہݨ دیہاتی علاقیں اچ وی نجی شعبہ اچ چنڳے ہسپتال بݨیسوں ۔ اتوار کوں لاہور ، پشاور اتے فیصل آباد اچ کوئی بکھا نہ سمے پرورگرام دے اجراء دے موقع تے تقریب توں خطاب کریندے ہوئیں وزیراعظم آکھیے جو ڈاکٹر ثانیہ نشتر کوں خاص طور تے کوئی بکھا نہ سمے پروگرام دے تصور کوں عملی جامہ پواوݨ تے مبارخ ݙینداں ۔ انہاں ایں تصور کوں ٹرک موبائل کچن دا تصور ݙتے تے عملی جامہ پوائے، جیڑھا جو علاقے ساریں توں ودھ پسماندہ اتے غریب ہوسن اتھاں ایں پروگرام دے تحت اے موبائل ٹرک لوکاں کوں روٹی ٹکر ݙیسسن ، ابتدائی طور تے وفاقی دارالحکومت اسلام آباد اچ پائلٹ پراجیکٹ شروع کیتا ڳیا ایندے اچ جیڑھیاں مشکلات پیش آندیاں پیاں ہن ایندا جائزہ ڳھدا ڳئے اتے ایندے توں بعد لاہور ، پشاور اتے فیصل آباد اچ اے پروگرام شروع کیتا ویندا پئے ، اے شروعات اے ایندا دائرہ کار پورے پاکستان اچ کھنڈایا ویسی ، غریب اتے پسماندہ علاقیں اچ موبائل ٹرک بھجوائے ویسن ۔ وزیراعظم آکھیے جو غریب اتے مستحق لوکاں کوں انہاں دے دروازے تے کھاݨا پڄایا ویسی ایندے نال ملک اچ برکت آسی ،ریاست مدینہ اچ قانون دی حکمرانی ،انصاف دے نال نال کمزور وغریب طبقے دی ذمے واری ڳھدی تے ایندی برکت نال تھوڑے عرصے اچ انہاں لوکاں دنیا دی امامت سنبھال ڳھدی ،موجودہ حکومت قانون دی بالادستی دی تاریخی جنگ لڑدی پئی اے ۔

مضمون کا ماخذ : números quina hoje

متعلقہ مضامین